NOCC បង្កើតសមិទ្ធផលកីឡាថ្មីប្លែកដើម្បីទាក់ទាញភ្ញៀវទេសចរណ៍នៅខេត្តសៀមរាប លោក វ៉ាត់ ចំរើន ដំបងភ្លើងដែលអត្តពលិកត្រូវកាន់រត់ក្នុងទិវារត់ប្រណាំងពេលរាត្រីនៅផាប់ស្ទ្រីតខេត្តសៀមរាប, រូបភាពពី NOCC
× គណៈកម្មាធិការជាតិអូឡាំពិកកម្ពុជា (NOCC) សហការជាមួយក្រសួងទេសចរណ៍ បង្កើតព្រឹត្តិការណ៍រត់ប្រណាំងពេលរាត្រីលើកដំបូង នៅតំបន់ផាប់ស្ទ្រីត ទឹកដីប្រវត្តិសាស្ត្រ ខេត្តសៀមរាបនាថ្ងៃទី៥ ខែវិច្ឆិកា ខាងមុខ។ អគ្គលេខាធិការ NOCC បានចាត់ទុកការរត់ប្រណាំងនេះ ជាសមិទ្ធផលកីឡាទេសចរណ៍ថ្មី ដើម្បីទាក់ទាញភ្ញៀវទេសចរឲ្យមកកម្សាន្ត នៅខេត្តសៀមរាប។
ដើម្បីទាក់ទាញភ្ញៀវទេសចរជាតិ និងអន្តរជាតិ មកទស្សនាតំបន់ទេសចរណ៍ប្រវត្តិសាស្ត្រអង្គរ ខេត្តសៀមរាប NOCC សហការជាមួយក្រសួងទេសចរណ៍ បង្កើតសមិទ្ធផលកីឡាទេសចរណ៍ថ្មីមួយ ឈ្មោះថា«ទិវារត់កម្សាន្តពេលរាត្រី នៅតំបន់ផាប់ស្ទ្រីត-សៀមរាប»។ នេះបើតាមការបញ្ជាក់របស់លោក វ៉ាត់ ចំរើន អគ្គលេខាធិការនៃ NOCC ហើយលោកបានបន្ថែមថា អ្នកចូលរត់ត្រូវកាន់ភ្លើងជ័រមានពណ៌ចម្រុះក្នុងដៃ និងពាក់កងភ្លើងនៅក ឬនៅកដៃជាដើម។
លោក សែម ផល្លា លើកបង្ហាញរូបភាពសកម្មភាពរត់ប្រណាំងនៅកម្ពុជាដែលទស្សនាវដ្តីបរទេសយកទៅចុះផ្សាយ
លោក វ៉ាត់ ចំរើន បានបញ្ជាក់ថា ថវិកាដែលប្រមូលបានពីការលក់សំបុត្រចូលរួមរត់កម្សាន្តពេលរាត្រីនេះ នឹងយកទៅជួយដល់មន្ទីរពេទ្យគន្ធបុប្ផា និងអង្គការនានាដែលធ្វើការមនុស្សធម៌។ អគ្គលេខាធិការ NOCC រូបនេះ បានបន្ថែមថា លោកនឹងព្យាយាមអភិវឌ្ឍន៍កម្មវិធីរត់ប្រណាំងពេលរាត្រីឲ្យក្លាយជាព្រឹត្តិការណ៍ដ៏ល្បីល្បាញ ដូចព្រឹត្តិការណ៍រត់ប្រណាំងផ្សេងៗទៀតផងដែរ។ សម្រាប់ការរៀបចំលើកដំបូងនេះ លោកអះអាងថា អាចមានអត្តពលិកចូលរួម មិនលើសពី៥០០នាក់ នោះឡើយ។
លោក សែម ផល្លា ប្រធានគណៈកម្មការរៀបចំការប្រកួតបានបញ្ជាក់ថា អត្តពលិកត្រូវរត់តាមបណ្តោយមាត់ស្ទឹងសៀមរាប ក្នុងចម្ងាយ៥គីឡូម៉ែត្រ ដោយនៅតាមផ្លូវរត់មានបំពាក់ភ្លើងចម្រុះពណ៌ និងមានបទភ្លេងកំដរទៀតផង។ លើសពីនេះ នៅចំណុចដល់ទី ក្រៅពីការបំពាក់មេដាយដល់អត្តពលិក និងមានការរាំលេងកម្សាន្ត ជាមួយចង្វាក់ភ្លេងនៅទីនោះផងដែរ។ ការរត់ប្រណាំងនេះ នឹងចាប់ផ្តើមនៅម៉ោង៧យប់ ថ្ងៃទី៥ ខែវិច្ឆិកា ឆ្នាំ២០១៧ខាងមុខ។
សំបុត្រចូលរួម មានតម្លៃ៨ដុល្លារសម្រាប់អត្តពលិកកម្ពុជា និងតម្លៃ២៥ដុល្លារសម្រាប់អត្តពលិកបរទេស ហើយអត្តពលិកដែលចុះឈ្មោះចូលរួម នឹងទទួលដំបងភ្លើងជ័រ និងកងភ្លើងម្នាក់មួយ រួមទាំងសម្ភារផ្សេងៗទៀត។ ការចុះឈ្មោះចូលរួមរត់ប្រណាំង នឹងបន្តដល់ថ្ងៃទី៥ ខែវិច្ឆិកាតែម្តង។
ទាំងលោក វ៉ាត់ ចំរើន និងលោក សែម ផល្លា សុទ្ធតែរំពឹងថា នៅឆ្នាំក្រោយៗទៀត ព្រឹត្តិការណ៍នេះនឹងទទួលបានការគាំទ្រកាន់តែច្រើន ព្រោះនៅតាមប្រទេសក្នុងតំបន់ និងលើពិភពលោកទទួលបានជោគជ័យក្នុងព្រឹត្តិការណ៍នេះ៕
© រក្សាសិទ្ធិដោយ thmeythmey.com